AUTORIDADE MUNISIPÁL LIQUIÇA HAMUTUK HO KONSELLU SUKU MAUMETA NO NGO NETIL HALAO LIMPEZA JERÁL IHA TASI-IBUN MAUMETA BA SELEBRASAUN ICC DALA 40

18 Sep 2026

Administradór

Imagen : Presidente Autoridade Municipal Liquica hamutuk ho funsionariu sira hotu hala’o Limpeza Geral iha Tasi ibun Maumeta, Foto husi Ekipa SISD-Maumeta. (18/09).

Maumeta, 18 Setembru 2026 – Iha kuadru selebrasaun Loron Internasional Hamoos Kosteira (International Coastal Cleanup – ICC) ba dala 40, tinan 1986–2026, Autoridade Munisipál Liquiça hamutuk ho membru Konsellu Suku Maumeta realiza atividade limpeza jerál iha área tasi-ibun Suku Maumeta, Munisípiu Liquiça.

Programa ne’e organiza liuhusi apoiu husi Organizasaun Naun-Governamentál (NGO) NETIL, nu’udar parte husi esforsu hamutuk atu prezerva tasi no promove ambiente ne’ebé moos no seguru ba komunidade kosteira.

Partisipasaun husi Konsellu Suku Maumeta konsidera importante tanba sira mak lidera diretamente komunidade lokál iha área ne’e. Envolvimentu ativu husi lideransa suku hamutuk ho Autoridade Munisipál hatudu kompromisu forte husi nivel governasaun lokál ba protesaun ambiente marítima.

Imagen : Membru Konsellu Suku Maumeta hamutuk ho Autoridade Municipio Liquica hala’o Limpeza Geral iha tasi Ibun Maumeta, Foto husi Ekipa SISD-Maumeta. (18/09).

Atividade limpeza ne’e mós hetan partisipasaun husi instituisaun públika, setór privadu, PNTL, juventude, estudante no komunidade lokál, hodi hamutuk foti lixu liuliu plástiku husi área tasi-ibun.

Selebrasaun ICC dala 40 ne’e iha objetivu atu prevene no hamenus polusaun iha Munisípiu Liquiça, Timor-Leste no Rejiaun Ázia, no atu hasa’e konsiénsia públika kona-ba importánsia konservasaun biodiversidade marítima.

Liuhusi kolaborasaun entre Autoridade Munisipál, Konsellu Suku Maumeta, no NGO NETIL, esperansa katak asaun hanesan ne’e bele kontinua nafatin no sai ezemplu ba komunidade seluk atu mantén ambiente tasi-ibun ne’ebé moos, saudável no sustentável ba jerasaun agora no jerasaun futuru.