Iha loron tersa-feira, dia 04 de Agustu 2026, hala’o ona seremónia abertura eskola pré-eskolar iha Suku Maumeta. Eventu ne’e loke ofisialmente husi Inspetór Edukasaun Munisípiu Likisa, hamutuk ho reprezentante Xefe Suku Maumeta no Delegadu Nartutu nu’udar membru Konsellu Suku Maumeta.
Programa pré-eskolar ida ne’e mai husi Ministériu Edukasaun ho objetivu atu forma no prepara labarik sira antes sira hahú tama ba nível ensinu báziku. Total estudante mak involve iha programa ne’e hamutuk 22 pessoa, kompostu husi mane 9 no feto 13, ho maioria iha idade 5 no 6 tinan. Aprendizajen sei lao durante fulan 5, hahú husi Agustu to’o Dezembru 2026.
Kona ba fasilidade, edifísiu eskola espesífiku ba labarik sira seidauk iha, tanba ne’e suku oferese sede tuan atu bele uza hodi hala’o prosesu ensinu-aprendizajen. Enkuantu ba parte pedagójika, iha manorin nain 2, feto hotu, kompostu husi manorin ne’ebé remata ona sira nia lisensiatura iha área edukasaun, no antes hahú hanorin sira hetan formasaun ba semana ida iha nível nasional.
Ho konklusaun programa ne’e, estudante sira sei simu sertifikadu nu’udar prepara ba sira atu bele kontinua ba nível ensinu báziku.
Hakerek : Ekipa SISD-Maumeta
Editor : Veronica J. Manek. Administrador SISD-Maumeta
