Maumeta, 22 Setembru 2026 – NGO Belun, ho apoiu husi Oxfam Timor-Leste, fasilita formasaun kona-ba mediasaun ba joventude feto no mane, hamutuk ho autoridade komunitária iha Suku Maumeta, Postu Administrativu Bazartete, Munisípiu Liquiçá.
Formasaun ne’e hala’o durante loron rua, husi 22 to’o 23 Setembru 2026, iha Salaun Sede Suku Maumeta. Atividade ne’e iha objetivu atu hasa’e no hametin konesimentu no kapasidade joventude, liuliu iha área mediasaun, prevensaun konflitu no promosaun dame iha komunidade
NGO Belun hanesan organizasaun sosiedade sivíl ne’ebé harii iha tinan 2004. Belun nia servisu foka ba pilar prinsipál tolu, mak prevensaun konflitu no promosaun dame; dezenvolvimentu kapasidade komunidade inkluziva; no peskiza, dezenvolvimentu polítika no advokasia.
Misaun Belun nian mak servisu ba sosiedade inkluziva, prevene konflitu, promove dame ho integridade, no dezenvolve inisiativa kreativa no inovativu.
Iha ámbitu programa prevensaun konflitu no promosaun dame, Belun kontinua hametin parseria ho Oxfam Timor-Leste liuhusi implementasaun projetu Strengthening Civil Society for Good Governance, ne’ebé implementa iha Munisípiu Liquiçá no Ermera.
Liuhusi projetu ne’e, Belun fó atensaun ba hasa’e konesimentu no kapasidade joventude feto no mane, atu sira bele sai mediador no autór importante iha prevensaun konflitu, rezolusaun konflitu no promosaun dame iha komunidade.
Loron Dahuluk – 22 Setembru 2026
Iha loron dahuluk, Representante Administradór Postu Administrativu Bazartete, hamutuk ho Xefe Servisu Lokál Finansas Postu Administrativu Bazartete, Sra. Feliçidade da Costa Soares, halo abertura ba formasaun
Partisipante hamutuk 16 ema partisipa iha formasaun loron dahuluk. Iha sesaun sira, partisipante aprende kona-ba komprensaun no natureza konflitu, análize konflitu, konseitu no prosesu mediasaun, prinsípiu-prinsípiu mediasaun, komunikasaun efetiva no rona ativa.
Atividade loron dahuluk taka ho sesaun reflesaun hamutuk, hodi fó oportunidade ba partisipante atu fahe esperiénsia, aprendizajen no dezafiu sira ne’ebé sira hasoru iha komunidade.
Loron Daruak – 23 Setembru 2026
Iha loron daruak, partisipante na’in 16 kontinua partisipa iha formasaun ne’ebé fasilita husi formadór na’in-rua husi NGO Belun.
Iha sesaun ne’e, partisipante aprende kona-ba etapa sira iha prosesu mediasaun, jestaun emosaun no tensaun, mediasaun sensível ba jéneru, no papél juventude iha konstrusaun dame.
Além de aprendizajen teóriku, partisipante mós hala’o prátika mediasaun liuhusi métodu role-play, hodi fó oportunidade ba sira atu aplika diretamente konesimentu no téknika mediasaun ne’ebé sira aprende durante formasaun.
Iha parte ikus, partisipante prepara no hakerek planu asaun hodi define pasu sira ne’ebé bele hala’o iha komunidade, liuliu iha área prevensaun konflitu no promosaun dame.
Formasaun ne’e taka ho realizasaun post-test no avaliasaun, seguidu ho mensajen no rekomendasaun husi partisipante. Atividade remata ho foto hamutuk entre partisipante no formadór sira.
Liuhusi formasaun ida ne’e, espera katak joventude feto no mane iha Suku Maumeta bele uza konesimentu no kapasidade ne’ebé sira hetan hodi kontribui ativamente iha prevensaun konflitu, fasilita diálogu, hametin koesaun sosial no promove dame no estabilidade iha komunidade.
Hakerek : Ekipa SISD-Maumeta
Editor : Verónica J. Manek, Administrador SISD-Maumeta
