Maumeta, 27 Agostu 2026 – Direksaun Saúde Munisípiu Liquiçá, liuhusi ekipa saúde, realiza atividade Tetu Labarik no fó vitamina ba labarik sira iha Eskola Pré-Escolar Maumeta, ne’ebé provizoriamente uza Sede Suku Maumeta nu’udar fatin atividade.

Atividade ne’e realiza ho objetivu atu apoia no promove saúde no kresimentu di’ak ba labarik sira, liuliu liuhusi monitorizasaun kondisaun saúde no fó suplementu vitamina tuir orientasaun husi servisu saúde.

Iha atividade ne’e, partisipa hamutuk 35 labarik, kompostu husi labarik mane 15 no feto 20, hamutuk ho professora sira no komunidade ne’ebé iha fatin. Ekipa saúde mos realiza sukat altura ba labarik sira hodi haree no monitoriza sira nia dezenvolvimentu fiziku.

Atividade ne’e hetan apoiu no kolaborasaun di’ak husi professora, responsavel eskola, autoridade Suku Maumeta no komunidade. Kolaborasaun entre servisu saúde no komunidade konsidera importante tebes atu garante labarik sira hetan atensaun saúde ne’ebé di’ak desde idade ki’ik.

Ekipa saúde hato’o mós apelu ba inan-aman no responsavel labarik sira atu kontinua fó atensaun ba nutrisaun, higiene no saúde labarik, no asegura sira partisipa iha programa saúde ne’ebé organiza husi servisu kompetente.

Atividade hanesan ne’e sei kontinua sai parte importante husi esforsu servisu saúde iha nível suku, ho objetivu atu hametin saúde no bem-estar ba labarik sira iha komunidade.

Hakerek           : Ekipa SISD-Maumeta

Editor               : Veronica J. Manek, Administrador SISD-Maumeta.