SISD-Maumeta, (10/07) – Ohin loron, atividade enseramentu jogu komunitaria ne’ebe lidera husi C.O Postu Bazartete hodi selebra ho laran-kontente Loron Nasionál Restaurasaun Independénsia Timor-Leste, dala 20 de Maiu, ne’ebe komemora iha tinan 2026.

Loron istóriku ida ne’e fó hanoin fila fali ba ita hotu kona-ba luta no sakrifísiu boot husi ita nia eroi sira no povu Timor-oan tomak, to’o mós ita nia Nasaun hetan fila fali ninia Ukun-An iha 20 de Maiu 2002.

Atu komemora momentu importante ida ne’e, Postu Bazartete organiza Jogu Komunitária Futsal ida ne’ebe hala’o  ho objetivu atu:

• Hametin unidade no solidariedade entre komunidade sira;
• Fó fatin ba juventude atu hatudu talentu iha desportu futsal;
• Selebra ho laran-kontente loron importante ba ita nia Nasaun.

Iha Jogu komunitaria ida ne’ebe hala’o abertura iha dia 15 de maio no ensera iha dia 10 de Julho 2026 ne’e, final jogu Klubu rua ne’ebe tama ba final mak Klubu “Fc Maumeta B hasoru Fc Foin Sae” iha kampo futsal Ulmera, loron sexta-feira dia 11 de Julho oras, 20:40 OTL.

Finalidade husi jogu refere ne’ebe Fc Maumeta sai hanesan vencedor ba jogu komunitaria refere hasoru Fc Foin Sae ho skor 3 – 1 iha minute ikus jogu refere.

Iha jogu komunitaria refere partisipa mos husi Xefe Departamentu Desportu Edukasional Edukasaun Fizika iha kampu futsal Ulmera, (10/07).

Jose Antonio Monteiro, nu’udar Xefe Departamentu Desportu Edukasional Edukasaun Fizika e reprezenta mos husi xefe departamentu Desportu komunitariu, hateten : Programa jogu refere programadu ona iha plano desportu komunitariu hodi komemora restaurasaun independensia 20 de Maio 2026. Ida ne’e mak ami halo ba postu 40 iha teritorio Timor, husi postu 40 ne’e fahe ba grupu 2, grupu 1 hamutuk postu 27 hodi komemora 20 de maio e depois kontinua fali ho postu 13 iha relasaun ho komemorasaun 30 de agusto mai. Hateten Xefe departamentu Desportu iha intervista ho ekipa SISD-Maumeta, (10/07) iha kampo futsal ulmera.

Atividade refere hetan suporta husi Ministeriu Joventude arte e desportu rasik hodi komemora dia nasional. Husi postu halo proposta hodi ba entrega iha nasional hodi aprova atividade refere hodi bele realiza iha kada postu, liu husi linha kordenasaun hamutuk ho pontu fokal postu administrativu Bazartete hodi bele realiza jogu komunitaria ida ne’e.

Atividade refere hala’o tuir matadalan termo da referensia ne’ebe envia liu husi pontu fokal joventude e deport mai iha pontu fokal postu e depois sira envia tutan fali ba Komisaun organizadora, liu husi matadalann ne’e mak hatudu regras hotu kedan iha jogu komunitaria refere, C.O hein hala’o tuir deit.

Mensagem husi Xefe departamentu desportu ne’e ba joventude sira, “ Jogu Desportu Komunitariu ne’e hanesan animasaun,amizade kria unidade katak kria atividade ne’ebe bele halo kontenti komunidade liliu halo kontenti inan aman sira. Tanba komunidade presiza halo divertimentu hodi kria ambiente ne’ebe ho ksolok hamutuk ho joven sira ita kria komunidade ne’ebe edukadu hodi ita bele limita problema social sira.” Hateten, Jose Antonio nu’udar Xefe departamentu Desportu komunitaria iha kampo futsal ulmera, (10/07).

Iha momentu ida ne’e mos, Domingos Freitas nu’udar Pontu Fokal Juventude desportu arte e Cultura iha Postu administrativu Bazartete, iha enseramentu ida ne’e mos reprezenta hanesan APA bazartete ba marka prezensa ohin loron, razaun Apa Bazartete sei iha Lisensa mensal tan ne’e delega Administrador interinu e tan interinu labele marka prezensa delega sr. Domingos hodi lidera atividade refere.

Husi Administrasaun Postu Bazartete realiza atividade jogu komunitaria refere ho objetivu hetan orsamentu husi Ministeriu Joventude arte e desportu ba realiza atividade refere iha kada postu, ho razaun refere postu kria komisaun ida hodi bele lidera atividade refere iha postu bazartete.

Orasamentu ne’ebe aprova ba atividade refere ho montante $. 3.200.00 (Dolar America). Durante hala’o atividade jogu komunitaria refere limitasaun ne’ebe C.O hetan mak  iha postu bazartete seidauk iha Kampo Futsal atu jogu refere realiza. Maibe ho linha kordenasaun husi C.O ho Postu no komunidade , Irmão Mario nu’udar komunidade desportivu ida ne’ebe ho esperansa hanesan hakarak kria atividade produtivu ba joven sira hodi oferese ninia kampu futsal gratuitamente ba joventude sira bele utiliza bainhira hala’o atividade jogu komunitaria ida ne’e.

Durante hala’o atividade desportu komunitaria ida ne’e joventude husi Klubu 22 mak rezistadu hodi tuir jogu futsal refere, kompostu husi klubu feto no mane mos.

Ba enseramentu jogu ohin loron klubu 2 ne’ebe tama ba final mak klubu ho naran Fc Maumeta B ho Fc Foin Sae, finalidade de jogu klubu ne’ebe sai manan nain mak klubu Fc Maumeta B ho skor 3 – 1.

Domingos Freitas mos hateten, em nome administrador Postu bazartete hato’o atividade desportu komunitaria refere ensensial tebes joven sira tanba durante atividade hala’o fulan hirak nia laran joven sira hamutuk ho komunidade antusias los hodi selebra jogu refere hala’o to’o remata ho diak.

Ha’u husu ba joventude sira liliu iha postu Bazartete, inklina an ba iha atividade sira hanesan ne’e hodi aumenta abilidade, hanesan joven tenki iha talent ne’ebe diak hodi dezenvolve iha area desportu. Hateten, Domingos Freitas Domingos Freitas nu’udar Pontu Fokal Juventude desportu arte e Cultura iha Postu administrativu Bazartete iha intervista ho ekipa SISD-Maumeta, iha kampo Futsal Ulmera, (10/07).

Zeca soares, nu’udar Presidente C.O ne’ebe lidera atividade Jogu Komunitaria husi postu administrative Bazartete hateten ; Preprasaun husi C.O ba premio ba manan nain sira mak hare husi aprovasaun orsamentu ne’ebe fo ba C.O jere.

C.O sei la sosa premio hanesan trofi ruma tanba hare ba limitasaun de orsamentu ne’ebe iha, tan ne’e C.O so prepara deit hanesan orsamentu ne’ebe iha hodi fo ba klubu sira ne’ebe sai hanesan manan nain ba jogu desportu komunitaria refere. Hateten Zeca Soares nu’udar Presidente C.O ba eventu jogu futsal komunitaria iha intervista hamutuk ho ekipa SISD-Maumeta iha kampu futsal ulmera, (10/07).

Teofilo Pereira dos Santos, nu’udar Treinador husi Klubu FC Maumeta B hateten; hare ba jogu futsal nian, hanesan treinador, maneira ne’ebe ha’u uza oinsa hare liu ba tatika no unidade da kampu husi jogador nian é mais importante tanba bainhira iha atakasaun ne’ebe makas husi parte seluk jogador sira tenki iha defeza ne’ebe metin no joga ho matenek tuir regulamentu Sistema ne’ebe mak iha ona.

Observasaun ba jogu ohin loron nian, jogador sira hatudu duni sira nia talentu ne’ebe diak iha jogu refere halo sira deskobre rasik sira nia abilidade idak-idak husi sira nia an ho nune’e mak ohin loron ekipa klubu Fc Maumeta B bele finaliza no sai manan nain ba jogu torneiu ida ne’e.

Em nome da juventude Suku maumeta husi Klubu rua Fc Maumeta A no Fc Maumeta B hato’o agradese tebes ba autoridade lideransa komunitaria suku maumeta ne’ebe ho inisiativa ho fuan ho matenek ne’ebe sempre suporta joven sira iha kualker situasaun sira hotu, to’o ohin loron ami bele partisipa iha atividade no eventu komunitaria husi postu Bazartete.

Ami fiar katak ba oin, kolaborasaun entre Membru konsellu suku liliu xefe suku, Victor da silva hamutuk ho joventude suku maumeta bele prepara diak liu tan joventude sira hodi bele partisipa iha eventu sira hanesan ne’e iha futuru mai.

Nu’udar Treinador nia mensagen ba jogador no joventude sira hotu, liliu juventude husi suku maumeta katak, nafatin garante didiplina no kontinua treinu nafatin hodi hasae ita bo’ot sira nia kapasidade atu nune’e it abele melhora hodi sai diak liu tan iha future. Ho razaun ida ne’e atu guia mos ita nia alin sira tuir mai atu lao tui rain fatin ne’ebe maun sira liu tiha ona, buat ne’ebe la diak ita hadia, buat ne’ebe diak ita kontinua nafatin. Hateten, Treinador Fc Maumeta B Teofilo pereira dos Santos iha intervista hamutuk ho ekipa SISD-Maumeta iha kampo futsal Ulmera, (10/07).

Durante loron sira ne’ebe hala’o jogu komunitariu ida ne’e, ita hotu haree ho matan rasik, oinsá Jogador sira hatudu talentu, espíritu desportivu, no laran-diak. Liu husi jogu ida ne’e, ita bele hare mós unidade no solidariedade komunidade Postu Bazartete, ne’ebe hamutuk hodi selebra loron istóriku ba ita nia Nasaun.

Hakerek             : Ekipa SISD-Maumeta

Edit                     : Administrador SISD-Maumeta